【Venus Minister VIII 之 天地傳說】 (五)

【Venus Minister VIII 之 天地傳說】 (五)


紫鈴到達一輛跑車前，卓鋒在車內開啟車門讓她入坐車廂，在車廂內；

鈴:  丞生，你好（只是看了卓鋒一眼，已不敢再看了，只看著自己雙手）

卓鋒:  你叫我  Chester 咪得囉，大家都咁後生，丞生前丞生後，咁老土

鈴:  咁你係高級職員，全大樓都係為你嘅研究做事，對你有禮貌係應該嘅

卓鋒:  (覺得她很煩悶) 你都好固執下架喎

鈴:  唔好意思呀，如果你唔介意，我就叫你 Chester 啦 （有些眼紅）

卓鋒:  咁咪好囉

全車程紫鈴不敢說一句說話，卓鋒載她到一高級西餐廳，卓鋒完全不懂男人紳士禮儀，不懂把女仕的座椅拉開讓她入座，但這並不是問題，因紫鈴也只是居住在屋邨的平民女孩，並不清楚有這樣的禮儀；

卓鋒:  (很不耐煩地) 你唔駛咁緊張架喎，見你全程都只係望住自己對手

鈴:  你唔好介意呀，因為我唔知可以做啲乜嘢，咪唯有望住對手囉 （這實在是害羞加上害怕的表現，害羞因她喜歡他，害怕因他隨時發怒，但卓鋒又怎會清楚人性呢，在他人生裡從未接觸過害羞的女孩）

卓鋒:  咁你依家仲望住？都要睇下 Menu 想食啲乜嘢先架嘛 （有點煩燥的聲線）

鈴:  Chester 你幫我揸住意吖，我乜都食架（看一眼卓鋒，卓鋒看到她的眼神是憂慮及眼紅紅的）

卓鋒以手掩嘴像徵式地咳嗽一下, 盡量把語氣溫柔一點:  紫鈴，我唔想比到壓力你，你亦都唔好比我覺得自己好似好嚴肅感覺好嗎？你抬起頭望住我好嗎？

紫鈴慢慢抬起頭看著卓鋒，近距離看著他，心想，面前的人是否人類？為何可以英俊到這樣的地步？他這樣的英俊外貌怎會對自己質素的女孩動心呢，而且他對自己的態度表明是不會喜歡自己的，對自己心動只會天方夜譚才會發生。於是安撫著自己，只要對他沒有痴心妄想，為何要害羞呢，以平常心對待著公司的一個高級上司，相信會好一點。

鈴:  （放鬆心情微笑著）Chester 你點會係嚴肅呢，個樣又唔係老成持重，睇落仲後生過我添呀，啲人會估我係你家姐添呀
卓鋒看著紫鈴，近距離看她，她的微笑比初初遠看時更親切可愛

卓鋒:  咁咪好囉，笑下個人都開心啲嘛，仲有呀，你咁細個，點做我家姐呀，唔好講呢啲先，你依家最想食啲乜呢？

鈴:  其實响餐廳食好貴，平時我會自己响屋企煎下牛扒食，又平好多又啱自己嘅口味。不過一場嚟到，試下呢度嘅牛扒有無我煮得咁好食先 （伸出少許舌尖，微笑著）

卓鋒看到她微笑的表情，伸舌尖？實在太可愛了，從未看過女孩有這樣的表情

卓鋒:  咁就叫牛扒喇，你要幾成熟？

鈴:  七成熟吖唔該

因紫鈴還未到最新的酒精類飲品合法年齡二十一歲或以上, 卓鋒並沒有為她點餐前酒, 為她點了鮮果汁, 自己一杯紅酒, 並為他們各點了一客七成熟的 Prime Rib ，牛扒上餐桌後，他們各自吃著；

卓鋒:  點呀？有無你煮得咁好食呀？

鈴:  嘩，啲肉質好幼嫩好滑呀，肯定係最靚嘅牛扒位置啦，我就真係煮唔到咁好食喇，因為我買唔起咁靚嘅牛扒嘛，哈哈，不過真係好好食，sorry呀我係鄉下妹一名 （又傻笑著）

卓鋒看到她這樣的真反應，有點心動，但他並不知這為之心動

卓鋒:  你鍾意食，咁出多啲嚟食吖

鈴:  唔得，我好窮架，食咁多餐，我會無晒錢架

卓鋒聽到啼笑皆非:  乜你認為我叫你出嚟食飯，要你出錢架咩？

鈴:  咁梗係啦，雖然你高級過我咁多，但你都係打份工之嘛，無理由要你請我嘅，你留番啲錢，請你啲女朋友好過啦。

卓鋒:  咁第一次出嚟食飯等我請你啦

鈴:  唔好，陣間除二啦，哈哈，咁公平啲嘛，係喎，Chester 其實你叫我出嚟食飯係咪因為我有啲乜嘢私人嘢影響到公司，唔方便响公司講，所以約出嚟講呀？

卓鋒:  點解你會咁諗？

鈴:  （停頓了一刻，有點擔心）唔通公司對我工作唔滿意？但無理由會由你同我講架喎？唉..唔估喇，你講喇

卓鋒:  我只可以答你無原因，就係只係想同你食餐飯咁簡單啫

鈴:  （經紫鈴和卓鋒這次的相處，她清楚知道卓鋒是對他沒有意思的，因此跟他說）唉，比你嚇死，仲以為有啲乜嘢私人問題咁嚴重要一個成座樓為佢做嘢嘅人約出嚟見面添，仲有呀，你唔好無端端咁約女仔出嚟食飯添呀，啲女仔會以為你鍾意佢架，我初初問你係咪搵錯人，咪就係咁解囉，哈哈（又傻笑著）

卓鋒被紫鈴告知才恍然大悟為何她在電話裡會這樣的回應。

最後的甜品到；

鈴:  Chester我真係食唔落喇，你食得落幫我食埋佢吖，唔好嘥嘛 (又伸一伸舌尖)

卓鋒:  （雖然外貌只是普通，但她實在太可愛了）食唔落就唔好食喇，太飽對身體都無益

賬單到了，紫鈴看一看價錢；

卓鋒和紫鈴離開餐廳，一泊車職員交車給卓鋒，他們一同坐入車廂，卓鋒就驅車載紫鈴返回大埔太和邨樓下，紫鈴在卓鋒不為意時把自己的一份餐食費放在車裡放置飲品的位置，下車前；

鈴:  Chester 多謝你介紹咗間咁好食嘅餐廳我食呀，聽日公司有機會見到嘅再見吖，早抖。（就關上車門步行到她家的大樓下）

卓鋒就駛車到自己的家，把車停下，看到放置飲品位置裡有數千元在內。心裡有不悅感，但也難怪這女孩，因為她本性就是處處為人著想，她認為和自己只是同事關係，找不到理由要他請客，為了他的面子，不在餐廳交錢給他，只放於他的車廂。


卓鋒回家後，聯絡兩位爸爸和媽媽；

卓鋒:  兩個爸爸，我上次比你哋個女仔資料，有結果未呀？

Venus:  我同 Hugo 搵到佢嘅所在地，依家仲經佢嘅腦電波研究緊佢嘅性格呀

Hugo:  做乜咁心急呀

倩:  仔，做乜事呀，唔係有乜事發生咗呀？

卓鋒:  我啱啱同佢出咗街食飯呀

倩:  咁咪好囉，唔係有乜事呀？咁緊張咁嘅？

Venus:  咪就係囉，仲心急過爸爸當年研究媽咪時

Hugo:  你偷步喇，仲好講

倩:  你哋又嚟喇

Hugo:  老婆唔好嬲，無嘢，我講錯，哈哈

Venus:  你唔恨得咁多架喇，我同老婆响地球識嘅

卓鋒:  你哋唔好咁啦，聽下我講先，得唔得呢

倩:  乖仔，唔駛理你兩個爸爸，同媽咪講吖

卓鋒:  佢初初點都唔敢抬頭同我講嘢架，我話咗佢幾句後，佢就抬一抬頭咁同我講嘢，個樣好委屈咁眼都紅埋，我見咁，咪放輕番啲語氣，佢之後先至抬起頭望住我，突然成個人放鬆晒咁，同我有傾有講咁，最後仲比番餐飯錢我呀，我有唔開心架，比番錢我咪即話我請唔起佢啦，但諗深一層又難怪佢，佢都係為人著想，佢認為同我只係同事關係，無理由要我請佢，仲為咗我嘅面子，唔响餐廳裡面比番啲錢我，只係放响我車裡面。

Venus, Hugo 及倩異口同聲地說:  因為佢知道你唔鍾意佢囉

卓鋒:  我從來都無講過鍾唔鍾意佢架喎

Venus:  因為你由始至終同佢講嘢嘅語氣都唔係同一個鍾意嘅人用嘅語氣講嘢嘛。除咗你放輕語氣嗰句

Hugo:  就係你放輕語氣嗰句後，佢先至敢抬頭望你，最緊要就係呢一刻，佢有可能第一次咁近距離咁望清楚你，知道你個樣咁靚仔，加上你一路都同佢講嘢嘅態度好明顯你係無可能睇得佢上眼，跟住同自己講，對你無幻想，又點會再對住你怕羞呢，佢有可能因為咁同自己講，你只不過係佢一個公司同事，咁對住同事又點會再唔好意思呢，所以咪成個人放鬆晒囉

倩:  佢之前成日唔敢望你，係因為佢鍾意你怕羞唔敢望你呀，仔，依家佢敢面對你，係因為佢已經只當你係佢同事，嚴格嚟講，你哋連朋友都唔係，只係同事呀

Venus:  即係就算你依家鍾意佢，佢都唔會相信呢個係事實架

Hugo:  不過都好嘅，起碼都仲係同事呀，唔係佢連同事都唔同你做，因為佢隨時都可以轉工架嘛

卓鋒:  唉，我仲想同你哋講，我近距離睇到佢個樣，比起遠睇時仲更加親切可愛添，唔止呀，佢啲小動作好可愛架

倩:  仔，媽咪就唔識睇人性喇，但聽你講少少佢同你食飯嘅經過，呢個女仔嘅性格都應該唔會太差嘅

Hugo:  Venus 你聽日得唔得閒去地球研究院呀？

Venus:  我平日都唔得架啦

Hugo:  咁我過去幫個仔跟下部儀器分析成點喇

卓鋒:  咁分析完同我講喎

倩:  仔，其實你唔一定得分析架啫，如果你發覺自己係鍾意佢嘅，就可以試下追佢架嘛，就算最後佢唔啱你，你哋可以分手架嘛

卓鋒:  我都唔知自己係咪鍾意佢

Venus, Hugo 及倩異口同聲地說:  好明顯你依家係鍾意佢呀仔

卓鋒:  係咩？

倩:  仔，地球夜喇，唔好諗咁多，快啲瞓喇

卓鋒:  哦，早抖媽咪，兩個好爸爸


卓鋒又如何睡得著呢，輾轉反側不能入眠，第一次感覺到情是什麼。


火星；

自從卓鋒研究到聯絡火星的儀器後，倩銅已再不需要到 Hugo 的實驗室了， 對 Hugo 而言亦可說好事，因除多了掛念，已不需要再面對妻子時要抑壓著自己不能和妻子擁吻及身體親密接觸的痛苦。他和妻子之間是真真正正地昇華到神級的愛。 兩人相愛，遠處掛念支持著對方, 情感中的三無, 無理無助無奈, 往往令人越覺淒美。
倩銅每天也和家人生活著，丈夫 Venus , 她父母及振鋒，間中劍銘和鎂絲的家庭會回家相聚。他們夫妻感覺人生很美滿，倩銅內心當然覺得對自己另一丈夫 Hugo 有虧欠，但也無他法.



地球；

卓鋒因不能入眠關係，早上很是疲倦， 告訴助手不回公司，他在家裡用虛擬顯示屏上地球互聯網到電訊公司的機密資料，查看紫鈴的手機號碼，致電給她；

鈴:  喂

卓鋒:  紫鈴，係我呀 Chester 呀

鈴:  你點知我電話號碼架？

卓鋒:  我研究科學架嘛，唔係好多嘢難到我架

鈴:  你想知，問我咪得囉，你咁做咪犯法囉，未經我同意而知，不過算你喇，唔同你追究。係咪有啲乜急事呢？

卓鋒:  我成晚都瞓唔到，今朝好攰返唔到公司

鈴:  點解呀？係咪啲牛扒唔乾淨，食咗你唔舒服呀？但我無事喎

卓鋒:  我都唔知，就係有啲唔舒服

鈴:  咁你就要休息多啲喇，但你打電話比我，係咪有啲乜嘢我可以幫到你呢？

卓鋒:  無呀，琴晚食完飯，聽完你嘅笑聲，突然好想再聽下你把聲啫

鈴:  （停了一刻，滿腦疑惑，什麼他是否喜歡我呢？沒可能吧？昨天晚上的態度還那麼不耐煩，可能是今天早上身體不適有錯覺而已） Chester, 我諗你真係有啲唔舒服喇，你快啲再休息下先，瞓醒就去睇醫生吖

卓鋒很失望，果然爸爸的分析正確，她不相信自己喜歡她

卓鋒:  或者我真係唔舒服啦，但我唔睇醫生喇，你依家可唔可以買啲感冒藥比我呀

鈴:  吓，我依家返緊工喎，你屋企人幫唔幫到你買呀？

卓鋒:  唉，你唔理我就算喇，無嘢喇

鈴:  我唔係唔理你呀，係我返緊工幫你唔到呀

卓鋒:  咁你請假咪得囉

鈴:  我未過試用期，無大假架，請事假要扣錢架，我人工又唔係多，琴晚餐仲咁貴，我要好慳先至可以儲番琴晚餐飯錢架，雖然好好食，但我真係食唔起架喇，你以後都唔好再叫我食飯喇，再係咁，我要申請破產架喇。

卓鋒真的想像不到只是一餐較為貴一點的晚餐對她是如此重負擔

卓鋒:  唔好意思呀，我真係唔知原來呢一餐對你嚟講已經用咗好多錢，其實我都話我請你架啦，你做乜要比番錢我呀。我一陣再打電話比你，你等我，好快。

卓鋒即致電會計部的 CFO 告知他現在他在家的私人實驗室工作，有些資料需要同事拿來給他，這同事必定是那位給她檔案的女同事黃紫鈴，還有她今天要留下實驗室助他一些工作。

CFO 召紫鈴到他房間:  丞生頭先打電話比我，叫你攞上次比佢睇嘅  file 去佢屋企喎，好急架，叫你即刻去，仲有你今日要留响佢個實驗室幫佢手。