警車及救護車到達, 把他們送院急救; Neil 協助調查, Neil 把自己眼看到的一切告訴警方及解釋為何到達現場;
逸徽因為出血較多, 救護車到達時已陷入昏迷, 需要現場即時急救及大量輸血,他父母在外憂心忡忡, 他們並不認識凱彤及她的家人, 與她的父母擦身而過也不清楚;
醫生急救後行出急症間隔, 逸徽父母急步前往醫生處;
醫生 : 你哋係宋逸徽邊位呢?
徽父 : 我哋係佢父母呀
醫生 : 已經急救咗, 暫時無生命危險, 但依家仲昏迷緊要留院觀察, 你哋同佢辦理入院手續啦.
逸徽父母放下心頭大石 : 唔該晒醫生
凱彤因 Neil 撞入屋時才割下手腕, 傷勢並不嚴重, 只因失血而感到暈眩, 處理傷勢後, 基本上可以出院,
醫生行出急症間隔, 問凱彤父母 : 你哋係岑凱彤邊位呢?
彤父 : 我哋係佢父母
醫生 : 依家同佢聯針包紮傷口無問題架喇, 可以出院架喇, 但你哋要留意佢個胎呀, 佢已經有咗四個星期架喇.
凱彤父母晴天霹靂, 但還需禮貌地跟醫生說 : 唔該晒醫生
凱彤父母安排轉送她到私家醫院, 她堅決反對 : 唔得, 我要同阿徽一齊, 你哋唔可以送我走架.
彤父 : 响醫院你根本就唔可以同佢一齊架啦,都唔會同病房, 更何況你依家可以出院架喇, 我哋只係想轉送你去私家醫院觀察你嘅傷勢同心理狀況啫 , 我諗佢都好可能佢已經出咗院添啦.
彤母 : 阿女, 做乜搞成咁呀
彤父 : 依家就算人哋唔告你, 警方都一定會起訴你架喇.
彤 : 你哋知唔知阿徽有無事呀?
彤母 : 你唔好理人哋住喇, 你依家有咗佢個 BB 呀.
凱彤興奮非常 : 真架, 太好喇, 佢依家點呀, 快啲同佢講吖, 佢就快做爸爸喇.
彤父 : 唉...佢叫乜名呀?
彤 : 佢叫宋逸徽呀
彤父 : 咁你等等啦, 我叫人了解下佢點先啦.
警方因 Neil 的證人口供, 已到凱彤處跟她落案.
女警 : 岑凱彤小姐, 你依家同一單企圖謀殺同自殺案有關.
彤 : 係呀, 係我做嘅...
彤父阻止女兒繼續說下去 : 你哋唔駛問住, 等我哋律師嚟先至問啦, 佢依家需要休息.
實情彤父到達醫院了解事件後已通知了家族常用的律師
女警 : 咁我哋一陣再嚟過啦
凱彤父親吩咐助手到醫院急救室詢問處詢問傷者宋逸徽情況如何, 答覆還在昏迷中, 但已轉送到病房;
助手轉告凱彤父親, 彤父 : 女, 佢仲昏迷緊,依家入咗病房, 唉.. 你搞乜想殺人呀.
彤 : 我可唔可以去見佢呀?
剛巧律師到達初步了解經過後 : 唔得, 你唔見得佢架,你比警方跟進緊, 暫時唔接觸得受害人架, 我依家要保釋你先, 唔係佢吔會拘留
你架喇.
彤 : 咁我唔轉醫院喇, 我想留响度, 可以偷偷去睇下佢架嘛.
彤父 : 你唔好再咁任性喇, 你係咪真係咁鍾意呢個男仔呀?鍾意佢又想殺咗佢.
凱彤歇斯底里叫著 : 我唔殺咗佢, 就會好多女人埋佢身架喇.
彤母見狀制止丈夫繼續 : 女, 乜事都無架喇, 我哋唔轉院喇, 返屋企啦, 等嗰個阿徽好番啲先至過嚟探佢啦好唔好?
彤 : 你哋話架, 咁我遲啲過嚟探佢架喇.
他們回到家中, 凱彤父親聘用了一位精神科醫生告訴他,女兒有了身孕, 如何在不影響胎兒情況下醫治女兒看似亢奮狀態的病症;同時跟律師商量如何對拆企圖謀殺及自殺案;
律師 : 如果個男人唔死得還好, 呢個情況其實只可以用小姐嘅精神狀況 bipolar disorder 同 major depression 去求情減輕判罪或者需要監護令 guardianship order、監督令 supervision order 或 治療令 treatment order, 但如果個男人唔好采死咗好大機會要用入院令即係入精神病院羈留觀察先可以唔駛坐監, 因為除咗嗰個比佢傷嘅男人,仲有另外一個男人做咗好有力嘅證人呀.
彤父 : 咁就用呢種方法去打啦, 如果咁唔好采個男人死咗, 你都要盡力搞到佢連精神病院都唔駛入啦.
律師 : 我會盡力架喇
在醫院裡的逸徽翌日已清醒, 院方通知警方;
男警 : 宋逸徽先生, 依家我哋要同你落口供, 同岑凱彤小姐有關嘅企圖謀殺同自殺案, 你同岑凱彤小姐係乜嘢關係呢?
徽 : 佢係我女朋友
男警 : 唔該你講一次事發經過吖
逸徽告訴警方事發經過後 : 阿 Sir 我女朋友傷勢點呀? 都唔希望佢有事.
男警 : 宋逸徽先生, 依家唔該你响份口供度簽個名吖 . 你都幾特別架喎 , 差啲比佢殺死仲咁關心佢.
逸徽相信凱彤因過份投入愛著他而作出偏激的行為, 她現在是需要醫生的治療過於判罪刑罰.
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
一星期後, 凱彤在沒有人發覺時偷偷地到逸徽的家探望他, 她看到逸徽床上正在午睡休息, 行到他的床邊坐下, 輕撫他的髮絲, 逸徽被她弄醒, 張開眼看到她;
逸徽驚慌地馬上起床 : 你過嚟做乜呀?我哋都係唔係咁方便再見架.
凱彤激動地擁抱著他 : 徽, 對唔住呀, 求你原諒我吖 , 好采阿Neil嚟咗救你咋 , 如果唔係我都唔知點算呀.
逸徽輕輕把她推開 : 你最好搵個醫生睇下先喇
凱彤委屈滿眼淚水地 : 有個醫生跟緊我架喇 (再嘗試擁抱他)
逸徽看到她的眼淚, 心軟地撫摸她的髮絲 : 咁你依家心情好番啲未呀? 諗嘢唔好再咁偏激喇.
彤 : 醫生話好番好多喇 , 徽, 講個好消息你聽吖 .
徽 : 乜嘢好消息? 律政處唔告你喇? 咁就好喇.
彤 : 你就快做爸爸喇
逸徽有著難以形容的興奮, 了解凱彤是出於精神不健康下,因過份愛自己, 恐怕失去自己才有如此失控的行為, 最重要是自己是真心愛她的, 無法掩飾喜悅的心情 : 真架, 太好喇,咁你就唔好壓到我哋個 BB 啦.
彤 : 你睇下你吖 , 都未出世已經偏心佢喇 .
徽 : 倆個都偏心, 其實同番你一齊之後, 已經好想同你組織家庭, 生幾個仔女, 但見你食避孕丸, 以為你唔想有 BB, 所以無提到.
彤 : 同番你一齊半年後, 我發覺原來我真係好愛你架, 所以我停咗食避孕丸, 好想盡快同你生 BB 架.
徽 : 即係我哋同 BB 好有緣啦 (吻凱彤的前額)
就在此時逸徽的父母剛到達兒子家探望他, 看到他們擁抱著, 估計是那害自己兒子的女人;
徽母盛怒地把她扯離開自己兒子 : 你仲害我哋個仔唔夠呀? 做乜仲攬實我哋個仔呀?
彤 : 世伯伯母, 對唔住呀, 我知錯架喇, 求你哋原諒我吖.
徽父 : 仔, 你做乜仲攬實佢呀?佢想殺死你架.
逸徽牽著凱彤的手 : 阿爸阿媽佢精神錯亂先至做錯事啫 ,有醫生睇緊佢架喇, 比啲時間佢吖 , 佢依家最需人支持架.
徽母 : 你仲拖住佢隻手, 容乜易無端端攞把刀出嚟拮你架 (扯開她的手)
徽 : 阿媽, 你唔好對佢咁粗暴呀, 佢有咗我個 BB 架.
彤 : 世伯伯母, 我真係知錯架喇, 好對唔住, 以前點都唔肯嚟見你哋 , 求你哋原諒我吖 .
徽父 : 唉 ...點解會咁架, 叫我哋點面對呀.
逸徽再牽著凱彤的手 : 彤, 你返屋企先吖 , 我諗我要時間同我阿爸阿媽傾傾, 你都要休息多啲呀, 有咗 BB 要休息多啲架知道嘛 .
彤 : 世伯伯母, 我走先喇, 遲啲見吖 .
凱彤離開逸徽的家,
徽母 : 仔, 你想我哋點呀,依家佢想殺死你呀, 有精神病架, 對你同對你哋將來個仔或者個女都唔會好架, 容乜易突然病發又想殺咗你哋架.
徽 : 係我之前同咁多女人一齊, 所以比唔到信心佢, 佢先至諗埋一邊變咗精神抑鬱啫 , 比啲時間佢吖 , 佢係富家女, 比人就慣咗, 少少刺激都受唔到,唔慣失敗, 唔慣比人嫌棄, 先至會做錯今次嘅事,我諗佢其實需要關懷, 需要人不厭其煩咁同佢講解人性架, 依家有醫生睇緊佢, 應該好好多架喇.
徽父 : 但佢今次一定比警察告架喎
徽 : 依家就係唔知點算, 不過佢阿爸咁有錢應該會搞得掂嘅 ,我都諗住寫求情信, 等法官可以網開一面, 罰都罰輕啲啦 .
結果起訴開庭也拖了一段時間, 逸徽和凱彤的兒子也出生了, 期間凱彤也是偷偷與逸徽見面, 最後法官因應凱彤的精神狀況報告及根據逸徽的求情信輕判她監護令 guardianship order, 但為了保護受害人,終生不能接觸宋逸徽直到真正治癒病情為止, 他們的兒子撫養權歸宋逸徽擁有, 判刑後,凱彤偷偷與逸徽會面, 他們倆擁抱著時,凱彤裂開了陰森可佈的笑容.
筆者後話:
江山易改, 品性難移, 是否定律?真愛是否也不能令劣性改變? 劣性盤根深種, 不能自拔, 有誰能夠細心地把劣根拔起時不傷及其他正常生長著而且良好幼少的根呢? 旁人亦不能挽救! 女主角凱彤到底真癡還是假傻?男主角逸徽的命運將會如何? 讀者們有何高見?
~~ 完 ~~
沒有留言:
張貼留言