劣盤根 （五）

劣盤根 （五）




他們這次租用了一渡假屋位於長沙海灘附近, 到達渡假屋, 一同換了沙灘裝互相為對方塗上防曬太陽油後出發到沙灘暢泳, 他們的出現有如明星般,高大健碩英俊的男仕, 身材均勻適中的漂亮女仕還穿上性感的比堅尼泳衣,沙灘上的聚光點全集中在他們身上, 實際這是為什麼凱彤喜歡逸徽的原因, 但逸徽喜歡凱彤並不是她的外表, 而是內心,從前跟她半年的同居及經過自己的惡運後, 她的性格是溫柔的, 對他無限付出, 論外表凱彤只可說是一般的漂亮而己.他們倆牽著手到淺水濕泥地慢步.

凱彤看到一些小水柱由泥地射出, 興奮地 :    你睇下, 幾得意有水柱射出架, 一定有小生物响泥裡面架.

徽 :   係呀, 有蜆响裡面囉, 你想唔想捉隻出嚟睇下吖?

彤 :   啲泥咁污糟唔制

徽 :   唔怕啦, 一場嚟到捉出嚟睇下都好嘛, 唔一定捉到架.

逸徽於是蹲下來用手向有小水柱的位置不停向下掘, 結果給他掘出一隻巨型的蜆,他交給凱彤.

凱彤用厭惡的眼神說 :   掉咗佢啦, 咁污糟, 你快啲洗乾淨隻手添喎, 唔係唔好掂我呀.

逸徽奇怪她有如此的表現, 他認為她應該是喜歡小動物有愛心的女孩, 至少不會嫌棄自己的污穢罷,但內心分析, 可能她只喜歡小動物, 而不喜歡小昆蟲或海洋動物, 亦因她生長於富有之家不太接受污穢的事物呢, 於是他以海水清洗手上的泥濘, 再牽著她的手返回他們租用的沙灘椅處, 再塗上防曬太陽油享受日光浴, 他們輕鬆愉快地渡過了一個舒適的週末.

他們除了平日到凱彤的家晚膳, 週末大多外出用膳, 這天他們到一小本經營的中菜館晚膳, 凱彤發現餸菜裡有一細小蟑螂, 逸徽正想告訴侍應更換另一碟;

凱彤阻止他 :  唔駛啦, 我哋唔好食喇, 走喇

逸徽心裡歡喜, 凱彤可能想大事化小, 小事化無, 不和菜館計較;

平日凱彤並不經常返回父親的公司工作, 翌日, 她在家裡致電食物環境衛生署投訴;

彤 :   我要投訴响深水埗 XX 街一間明菜館, 佢哋啲餸有曱甴呀, 我食完之後又痾又嘔,嚴重腸胃炎呀, 你哋快啲搵人查佢哋啦, 我有咗架, 咁會影響我肚裡面個 BB 架, 咁可大可小架嘛.

食物環境衛生署職員 :  唔該晒, 我哋會跟進架喇.

凱彤一星期後到這菜館看是否有食物環境衛生署張貼告示菜館不能營業, 但未見張貼, 她因此繼續致電投訴, 連續投訴數星期後, 某天她繼續投訴, 剛巧逸徽需要回家拿漏取的文件, 他聽到凱彤的對話;

彤 :  食物環境衛生署呀, 呢次係我第五次投訴深水埗 XX 街一間明菜館喇, 如果我再見唔到你哋釘佢牌,我就會同報館講你哋辦事不力, 莫視市民生命, 你哋最好响呢個星期行動啦, 唔係下星期就見報架喇.

逸徽聽到她的說話後, 心裡不禁問為何她變成這樣呢? 要置人於死地方可罷休?



半年同居生活後, 逸徽的朋友在這半年經常相約他出外消遣, 他也拒絕了, 過了這半年的蜜月期, 逸徽對凱彤說:   彤, 我都好耐無同啲朋友出去飲下嘢傾下計喇, 呢個 weekend 佢哋又約我出去飲嘢喇, 今次我都想出去同佢地聯絡下,好唔好呀?

凱彤心裡不悅, 但表現大方地 :    係啦, 你都好耐無同你啲朋友飲嘢喇, 朋友嘛, 係要得閒聯絡下嘅.

徽 :   咁我同佢哋吹完水就返屋企架喇

逸徽吻凱彤後出門赴約, 在十一時前已返回家; 兩個星期後, 逸徽同樣被朋友邀約, 凱彤照樣表現大方讓他赴約, 如是者每星期也有類似約會,而逸徽開始過了十二時才歸家.

某天凱彤跟逸徽說 :   徽, 你同你啲朋友咁老友,有無諗過同佢哋夾份搞下生意仔呀, 一嚟你又可以同佢哋聯絡友誼唔係只可以响酒吧度, 二嚟你又可以有機會賺到錢,快啲還番啲錢比我嘛.

徽 :   唔係無得諗嘅, 但我無錢喎.

彤 :   我有個朋友有個食市舖位頂讓呀, 其實佢主要想同我爸爸打好關係, 所以根本就係送個舖比我唔收我錢, 咁舖位當你出, 除咗舖位嘅頂讓外, 你啲朋友出其他嘅資金啦,咁你咪係無本生意囉, 真係有得諗架.

徽 :   咁就真係可以諗諗喎, 但唔知佢哋想唔想夾錢做生意架喎.

彤 :   問下佢哋先喇, 可能佢哋都想試下呢, 不如我同你哋一齊傾下吖. 


週末夜逸徽帶同凱彤到酒吧跟他的朋友商討生意, 他們看到她一同到來也報以奇怪的眼光,但當然仍表現非常歡迎的態度;

朋友 1 :   嘩, 阿嫂咁好同阿徽一齊嚟呀?

其餘四位朋友一同說 :  係啦

朋友 2 :  阿嫂啤酒啱唔啱呀?

朋友 3 :  阿徽會幫佢叫架啦, 駛我哋粗心.

彤 :  你哋好嗎? 我係阿彤呀, 今日我出現好似好唐突咁, 放心我唔係專登嚟掃大家興架, 大家唔駛咁緊張, 好似平時咁就得架喇.

朋友 5 心想那有人帶另一半出席呢?又那能以平常心對待她呢? 這年除了逸徽, 他們還在獵艷呢, 事實她是來掃興啊 :    我諗阿嫂响度, 我哋都係唔好飲咁多酒喇, 今晚飲少啲喇, 咁多位兄弟.

彤 :   又點解要飲少啲呢, 不過如果你哋有揸車, 都係唔好飲咁多好, 阿徽可以飲嘅, 因為我可以揸車嘛

徽 :   咪係, 平時咁叫嘢飲啦.

朋友 1 :  咁阿徽飲啤酒喇, 自己嚟啦.

徽 :   其實我今晚想同你哋商量下一齊夾份搞生意架.

朋友 2 :   哦, 原來正經嘢, 咁有啲乜嘢好介紹呢?

徽 :   我女友個朋友有間日本餐廳想頂手, 個舖我都睇過,樣樣都好企理, 基本上只要係咁二執下就可以開張做生意架喇.

朋友 5 :  邊有咁多錢做生意呀?

朋友 1 :  頂手費幾錢先?

徽 :   間舖嘅頂手費已經搞掂架喇, 你哋只係出資其他嘅費用, 有限錢, 分分鐘你哋每人唔駛十萬, 幾萬蚊可以搞掂.

朋友 2 :   好似好吸引咁喎, 幾萬蚊就可以過老板癮.

朋友 4 :   唔係咁簡單嘅, 開張之後嘅皮費點分灘先, 賺洩點計先.

朋友 3 :   多人就會複雜架喇

徽 :   扣除頂手費之後, 頂手費係最多錢架喇, 你哋唔駛擔心, 我會搞掂, 剩番預算需要嘅費用你哋五個人除五份出資, 開張之後所有皮費賺洩都除六平均灘分,有無問題?

朋友 2 :  我就去馬喇, 又唔係多錢, 買股票都唔只咁少啦

朋友 1 :   咁大筆頂費你一個出, 但賺洩你同我哋平均分, 咁唔 fair 你都制?

徽 :   我女友同我 bargain 緊個我可以應付嘅價, 呢方面你哋唔駛擔心, 加上兄弟嘛, 無計嘅

朋友 3 :  咁全數平均分, 工作又點分呢?

朋友 4 :   如果阿徽咁洩底自己出晒頂手費都制, 咁我放工後落手落腳做都無問題嘅

朋友 5 :   我就話要親身去睇下個舖先喇

徽 :   咁一於咁話搵日一齊落舖位睇下, 再決定搞唔搞呢檔嘢啦.

凱彤只坐在逸徽身邊不發表任何意見以示支持男朋友的一切

他們六人看過舖位後, 他們所有人也願意合資這日本餐廳,經過裝修添置一切用品後, 開張營業, 正所謂創業難, 期間除了新開張時的首月可賺多於月費, 往後數個月也是生意清淡, 他們每月需要倒貼支付月費開出, 兄弟由微言至因財失義而關係決裂.


從此逸徽失去了這五位朋友, 再沒有經常約會的朋友, 只剩下甚少見面的朋友;他唯有繼續每天只跟凱彤一起過平常的家庭生活, 偶爾也罕有地與甚少見的朋友相聚,但他也樂得跟她一起甜蜜地生活;

平凡生活因為一男人的出現而改變了, 某週一工作天, 逸徽在公司出外午膳時, 有一位陌生男人出現他面前;

這位陌生人外表有點俗稱的 ABC感覺 :  宋逸徽先生你好嗎? 我係 Neil.

逸徽非常驚愕地 :    阿Neil 呀, 我唔識你架喎, 你點知我個名架?

Neil :   我係嚟幫你架

徽 :   你幫我乜呀? 祈福黨呀? 我好窮架, 你搵錯對象喇, 哈哈...

Neil :    我唔想再有一個人受害呀

徽 :   你唔好講啲唔講啲啦, 到  point 啲 吖 唔該.

Neil :    你依家個女友係岑凱彤係咪?

徽 :    係呀, 你搵人起我底呀?

Neil :    唔係搵人, 係我自己起佢底, 因為我以前都係一個受害者,因為佢我要响美國坐監.

徽 :   吓 , 你講乜呀?

Neil :    我就係趁你食 lunch 佢好少呢段時間搵你, 先至嚟通知你架, 方唔方便搵個地方坐低講清楚你聽?

徽 :   你講到咁都要知你乜嘢葫蘆賣乜藥啦